МУХІ-ШЧАБЯТУХІ

 

      Дзяўчынка Маня сядзела на табурэце і аблізвала

лыжку з-пад варэння. Лыжка была вялікая,

а варэнне салодкае і пахучае. Маня нязграбна

павярнулася і адна вялікая салодкая кропля

паляцела на падлогу...

― Плямс.

 

  Зляцеліся на дармавое дабро мухі і так забзыкалі, крылцы растапырылі, хабаточкі выцягнулі, пачалі выхваляцца адна перад адной:

― А я ўчора на выставу мастака-імпрэсіяніста  хадзіла, ― шчабятнула адна, ― усе карціны абгледзела, абседзела і нават на смак запытала...

― Што выстава, я вось напярэдадні ўвесь дзень на мэрсе каталася, на мяккіх скураных крэслах сядзела, марожанае ела з разынкамі, ― бзыкнула другая мушка-задавушка.

― Не, сяброўкі, што не кажыце, зусім не прадзвінутыя вы, – прапішчала трэцяя, ― колькі вас не вучы, колькі ні гавары, а вы ўсе роўна за сваё. На тусоўкі не ходзіце, у свеце не бываеце. А ўчора, між іншым, адкрылі ў нашым горадзе новы дом мадэляў, вось глядзіце якія я сабе чаравічкі цудоўныя адхапіла... Бляск…

― Ды што вы ўсё мельцяшыце, мяльцяшыце... Я вось на днях да самаго Прэзыдэнта на прыём трапіла. У нас там інтэрв’ю бралі, фатаграфавалі з розных бакоў: і так, і гэдак, а потым у вячэрнім выпуску навін паказвалі. Паглядзіце, як я вам? − не утрымалася палітычна падкаваная мушка-дарадца.

― Што Прэзыдэнт, што вашы чаравічкі − а мяне ўчора тэ-ле-пар-ты-ра-ва-лі, ― таямніча прапішчала мушка з залацістым брушкам.

― Теле-пар… што ? ― замаўчалі, і нават перасталі бзыкаць сяброўкі.

― Телепартацыя ― гэта перамяшчэнне ў прасторы без механічнага ўздзеяння, ― ганарліва прапішчала мушка і задрала ўгару свой чорненькі хабаток. ― У навуковай лабараторыі, што тут непадалеку, праводзілі выпрабаванні новага тэлепартацыйнага апарата... А я туды шмых, непрыкметна прыстасавалася да шыльдачкі, прысела ― нават і не заўважыла, як перамясцілася з аднаго канца горада ў другі.

― Фу, знайшла чым здзівіць, ― апамяталася маленькая ўвішная мушка з доўгімі далікатнымі лапкамі. ― Вось я не так даўно з зялёнымі чалавечкамі пасябравала, на іхняй НЛА лётала! Ніякая твая тэлепартацыя нават у параўнанне з гэтым не ідзе. На такім апараце можна і на Марс, і на Юпітэр злётаць ―  было б толькі жаданне.

― А я, а я… ― бзыкнула вялікая чорная муха, ― а я ўсе варэнне з’ела.

   Пакуль сяброўкі мушкі шчабяталі, таўстуха-муха ўсё варэнне да апошняй кропелькі сабрала.

 

Наталля Хмялеўская 2008 г.